AGUISÍN III

Cairt an Íospartaigh

Ról Oifig an Stiúrthóra Ionchúiseamh Poiblí

Nuair a thugann duine tuairisc faoi choir thromchúiseach, déanann na Gardaí (nó gníomhaireachtaí eile) imscrúdú mar gheall air agus seoltar comhad chuig Oifig an Stiúrthóra Ionchúiseamh Poiblí. Déantar scrúdú san Oifig ar an gcomhad d’fhonn a fheiceáil an bhfuil dóthain fianaise ar fáil le duine a ionchúiseamh sa choir agus a dhéanamh amach cén chúis ba cheart a thabhairt.

Cinneadh an ndéanfar ionchúiseamh

Is cinneadh tromchúiseach an cinneadh ionchúiseamh a dhéanamh – d’fhéadfadh tionchar fadtéarmach a bheith aige ar íospartach na coire agus ar an té a chúisítear ann. Is é an Stiúrthóir Ionchúiseamh Poiblí amháin nó duine dá chuid oifigeach ar féidir leo socrú an ndéanfar ionchúiseamh i gcásanna tromchúiseacha, mar shampla dúnmharú, ionsaí gnéis nó tionóisc bóthair a dtagann bás dá bharr.

D’fhéadfadh na Gardaí socrú ionchúiseamh a dhéanamh maidir le coireanna nach bhfuil chomh tromchúiseach. Is in ainm an Stiúrthóra Ionchúiseamh Poiblí a dhéantar an t-ionchúiseamh agus tá de cheart ag an Stiúrthóir Ionchúiseamh Poiblí treoir a thabhairt do na Gardaí faoin modh a ndéileáiltear leis an gcás.

Sa chás go socraítear gan ionchúiseamh a dhéanamh, is do na Gardaí a rinne imscrúdú ar an gcás amháin a thabharfar na cúiseanna leis an gcinneadh. Ní thugtar na cúiseanna d’íospartaigh ná dá gcuid gaolta. Tá breithniú á dhéanamh ag an Stiúrthóir ar an bpolasaí sin faoi láthair féachaint an bhféadfar na cúiseanna a thabhairt san am atá ag teacht.

Feidhmítear go neamhspleách agus cinneadh á dhéanamh an ndéanfar ionchúiseamh nó nach ndéanfar. Ciallaíonn sin nach féidir le haon duine eile, fiú amháin an Rialtas, a rá leis an Oifig ionchúiseamh a dhéanamh nó gan ionchúiseamh a dhéanamh maidir le cás ar bith.

Cionta a ionchúiseamh sa chúirt

Cuirfidh na Gardaí in iúl duit má cinneadh ionchúiseamh a dhéanamh agus, más amhlaidh gur cinneadh, tráth agus ionad an chás cúirte. Nuair is i mBaile Átha Cliath a dhéantar cás a ionchúiseamh, is iad na Gardaí nó aturnae de chuid na hOifige a dhéanann ionadaíocht thar ceann na hOifige sa chúirt. Nuair is taobh amuigh de Bhaile Átha Cliath a bhíonn an chúirt, is iad na Gardaí nó an t-aturnae stáit áitiúil a dhéanann an ionadaíocht.

Is sa Phríomh-Chúirt Choiriúil, an Chúirt Chuarda Choiriúil nó an Chúirt Choiriúil Speisialta a éistítear na cásanna is tromchúisí. I gcásanna den chineál sin, déanfaidh an t-aturnae ionchúisimh nó an t-aturnae stáit áitiúil:

• Doiciméidí cúirte a ullmhú, mar shampla leabhair fianaise (ráitis agus eolas eile mar gheall ar an gcoir); agus
• Treoir agus cúnamh a thabhairt d’abhcóidí an ionchúisimh.

A mbeidh súil agat leis ó Oifig an Stiúrthóra Ionchúiseamh Poiblí

Cinntí faoi ionchúisimh

• Tabharfar aon tuairimí a chuireann tú in iúl san áireamh sula ndéantar cinneadh maidir le hionchúiseamh.
• Sa chás go n-iarrann tú go ndéanfaí athbhreithniú ar cheann dár gcinntí, déanfar an cinneadh a scrúdú agus, más féidir sin, cuirfear faoi athbhreithniú é. Oifigeach eile seachas an t-oifigeach a rinne an cinneadh a dhéanfaidh an t-athbhreithniú.

Sa chás gur finné atá ionat

• Caithfear le meas leat agus tabharfar do chás féin, do chuid cearta pearsanta agus do chuid dínite san áireamh.
• Oibreofar i gcomhar leis na Gardaí d’fhonn cinntiú go gcoinnítear ar an eolas tú faoin gcás, go háirithe má tá cion foréigin nó gnéis i gceist.
• Déanfar socrú ionas go bhféadann tú labhairt le aturnae agus abhcóide an ionchúisimh más mian leat sin sula dtosaíonn an cás cúirte. Míneoidh siadsan an ní a tharlóidh sa chúirt ach níl cead acu labhairt leat faoin bhfianaise a thabharfaidh tusa.

Pianbhreith

• Sa chás go síleann an Oifig pianbhreith a bheith níos boige ná ba chóir, is é sin ró-éadrom gan údar maith leis, féadfaimid a iarraidh ar an gCúirt Achomhairc Coiriúil athbhreithniú a dhéanamh mar gheall uirthi. Is féidir leis an Oifig athbhreithniú a iarraidh madiri le pianbhreitheanna ón bPríomh-Chúirt Choiriúil, an Chúirt Chuarda Choiriúil agus an Chúirt Choiriúil Speisialta ach ní féidir maidir le pianbhreitheanna de chuid na Cúirte Dúiche.

Sa chás nach sásta a bhítear leis an obair

Sa chás go bhfuil ceist ort nó gearán le déanamh agat faoin Oifig, is féidir comhfhreagras a dhéanamh le:

An Stiúrthóir Ionchúiseamh Poiblí

14-16 Sráid Mhuirfean Uacht.

Baile Átha Cliath 2

Teil: + 353 (0)1 678 9222

Faics: + 353 (0)1 661 0915

Suíomh idirlín: www.dppireland.ie

Tá na leabhráin eolais Ról an Stiúrthóra Ionchúiseamh Poiblí agus Freastal na Cúirte i d’Fhinné duit le fáil ar an suíomh idirlín.

Cairt an Íospartaigh - Athbhreithnithe i Meitheamh 2008