2. Athbhreithniú ar an Mbliain

Mar a dúradh i gcaibidlí roimhe seo, is é croilár oibre Oifig an Stiúrthóra Ionchúiseamh Poiblí ná comhaid maidir le himscrúdaithe coiriúla a scrúdú, cinntí a dhéanamh cibé acu ar chóir nó nár chóir ionchúiseamh a thionscnamh, agus i gcásanna ina ndéanfar amhlaidh an cás a ullmhú agus a chur i láthair sa chúirt. Leagtar amach anailís sonrach maidir leis an ngnéith seo dár gcuid oibre i gCaibidil 10 den tuarascáil seo.

Is gá na hacmhainní, struchtúir, próiseanna agus córais chuí a bheith againn chun obair na hOifige a chur i gcrích. I rith na bliana 2004 leanadh ar aghaidh le cur i bhfeidhm chlár nuachóirithe na státseirbhíse laistigh den eagraíocht a chabhraigh go mór le forbairt agus le feabhsú na dtacaíochtaí fíorthábhachtacha sin.

Foilsíodh ár Ráiteas Straitéis don tréimhse 2004 - 2006 go luath sa bhliain a thug deis dúinn ár bplean straitéiseach a leagan amach don tréimhse trí bliana agus díriú ar na hoibiachtaí fíorthábhachtacha a céannaíodh a bheith bunúsach maidir le seirbhís éifeachtúil agus éifeachtach ionchúisimh a sholáthar. I rith na bliana 2004 rinneadh dul chun cinn substaintiúil i dtreo na n-oibiachtaí fíorthábhachtacha sin a bhaint amach.

De bharr roinnt tionscnamh nuachóirithe a cuireadh i bhfeidhm maidir le raon fairsing gnéithe, bhí an Oifig in ann an bunús a leagan a bheidh ina bhunchloch dár gcuid oibre sa todhchaí. Cuireadh tuarascálacha sonraitheach maidir le dul chun cinn inar léiríodh forbairt na dtionscnamh seo faoi bhráid Ghrúpa Fíoraithe Feidhmíochta na Státseirbhíse i rith na bliana chun ár n-oibleagáidí faoin gComhaontú Comhpháirtíochta Sóisialaí, Dul chun Cinn a Chothú, a chomhall. Tugadh cuireadh don Oifig seo láithriú os comhair an Ghrúpa Fíoraithe Feidhmíochta na Státseirbhíse i mí Deireadh Fómhair 2004 chun an dul chun cinn a baineadh amach agus ár bpleananna chun an tseirbhís ionchúisimh a fhorbairt sa todhchaí a imlíniú tuilleadh. Dhaingnigh an Ghrúpa Fíoraithe Feidhmíochta na Státseirbhíse gur chomhlíon an Oifig ár n-oibleagáidí faoin gcomhaontú Dul chun Cinn a Chothú agus gur saothraíodh íocaíocht na méaduithe pá a fuair na gráid foirne go léir i rith na bliana faoin mbabhta ginearálta. Tá na Tuarascálacha maidir le Dul chun Cinn a sholáthar an oifig seo don Roinn Airgeadais le fail ar láithréan gréasáin na Roinne ag www.finance.gov.ie.

An Timpeallacht Dhlíthiúil

Oibríonn an Oifig i dtimpeallacht dhlíthiúil atá ag athrú i gcónaí. Dá bhrí sin, tá sé tábhachtach dúinn súil a choinneáil ar fhorbairtí dlíthiúla náisiúnta agus idirnáisiúnta agus a chinntiú go bhfuil na hacmhainní ag an bhfoireann chun déileáil leis na dúshláin a thagann le gnéithe nua den dlí coiriúil, atá ag éirí níos casta i gcónaí. Tá sé tábhachtach freisin dúinn oibriú agus dul i gcomhairle go dlúth le gníomhaireachtaí eile a bhíonn ag plé le coireacht a ionchúiseamh. I rith na bliana 2004 d'fhorbair muid roinnt tionscnamh chun dul i ngleic leis na riachtanais sin.

Leanamar d'infheistíocht a dhéanamh i Seirbhísí Bainistíochta Leabharlann leictreonach a lig dúinn an Cartlann Dhigiteach Meán a fhorbairt, a cuireadh ar bun don chéad uair i Nollaig 2003, rud a chuireann rochtain deisce ar líne tráthúil ar fáil don fhoireann maidir le breithiúnais cúirte nár tuairiscíodh, ciorcláin de chuid an Gharda Síochána, páipéir taighde dlí, treoracha inmheánacha áirithe agus ár ráiteas nuachta inmheánach maidir le cúrsaí dlí reatha.
Mar thoradh ar riachtanais a céannaíodh tríd an gCóras Bainistithe agus Forbartha Feidhmíochta, leagadh amach mar thosaíocht inár bPlean Oiliúna agus Forbartha don bhliain 2004 díriú ar oiliúint dhlíthiúil agus cláir oideachais dlí leanúnach don fhoireann. Eagraíodh roinnt seisiúin oiliúna dlí laistigh den oifig le habhcóidí ón Leabharlann Dlí maidir le gnéithe den dlí ina raibh spéis shonrach. D'fhreastal 42% den fhoireann ar chomhdhálacha náisiúnta agus idirnáisiúnta i rith na bliana a phlé le gnéithe den dlí agus cuid acu a bhain go háirithe le hionchúiseamh coiriúil.
Lean an Oifig ar aghaidh le seimineáir agus comhdhálacha a eagrú dár ngeallchoimeádaithe i rith na bliana 2004 chun deiseanna a chur ar fáil chun an cleachtas is fearr maidir le hionchúiseamh coireachta a phlé agus díospóireacht a dhéanamh agus eolas a roinnt maidir leis an ábhar céanna. Tionóladh Seimineár Bliantúil na nAturnaetha Stáit i mí Eanáir 2004 agus phlé na toscairí ábhair éagsúla lena n-áirítear achomhairc i gcoinne pianbhreitheanna ró-thrócaireacha; An Acht fán gCoinbhinsiún Eorpach um Chearta an Duine, 2003; agus Acht na nGiúiréithe, 1976. Tionóladh an 5ú Comhdháil Bhliantúil d'Ionchúiseoirí i mí Bealtaine 2004 ag a raibh níos mó ná 200 toscaire i láthair ag déanamh ionadaíocht do ghníomhaireachtaí éagsúla atá páirteach sa chóras ceartas coiriúil. Ag Cur in aghaidh Phornagrafaíocht Leanaí a bhí mar théama ag an gComhdháil agus ar na cainteoirí bhí an Dr. Patrick Walsh ón Granada Institute; Tom O'Malley ó Choláiste na hOllscoile Gaillimh; Esther George, Comhairleoir Polasaí, Seirbhís Ionchúisimh na Corónach, Sasana agus comhaltaí ón Aonad Imscrúdaithe Coireachta Ríomhaire ó Bhiúró Imscrúdaithe Calaoise an Gharda Síochána. I mí Samhain 2004 d'óstaigh an Oifig seo, in éineacht le hOspidéil na Leanaí i gCroimghlinn agus i Sráid Teampaill, comhdháil maidir le Leanaí is Finnéithe, ábhar a ndéileáltar leis i gCaibidil 7 den tuarascáil seo. Bhí an onóir ag an Oifig seo freisin an 7ú Comhdháil Eurojustice a tionóladh i gCaisleán Bhaile Átha Cliath i mí Deireadh Fómhair 2004 a óstú, ag a raibh ceannasaithe seirbhísí ionchúiseamh thíortha an Aontas Eorpaigh i láthair, lena n-áirítear na deich tíortha nua. Tá tuairisc ar an gcomhdháil seo i gCaibidil 8 den tuarascáil seo. Ar deireadh, thionól Coiste Dlí Coiriúil an Chomhlachas Barra Idirnáisiúnta a 7ú Comhdháil faoi Choireacht Tras-Náisiúnta i mBaile Atha Cliath i Meitheamh 2004. Ghníomhaigh an Stiúrthóir Ionchúiseamh Poiblí mar chomhchathaoirleach ar an gcomhdháil.
I mbliana, chuireamar tús le clár de sheimineáir oiliúna réigiúnach do chomhaltaí den Gharda Síochána ag leibhéal Ceannfoirt. Thosaigh na seimineáir i mí Deireadh Fómhair 2004 agus b'iad comhaltaí ón Oifig a sheol na seimineáir. Go dtí seo, seoladh seimineáir i mBaile Átha Cliath, Sligeach, Corcaigh, Cill Chainnigh, Gaillimh and Muilleann gCearr. Tá deis iontach curtha ar fáil dúinn leis an gclár seo caidreamh a bheith againn le comhaltaí sinsearacha den Gharda Síochána a bhíonn ag ionchúiseamh cásanna achoimre thar cheann na hOifige i gCúirteanna Dúiche ar fud na tíre agus a chuireann comhaid imscrúdúcháin le chéile chun iad a chur faoi bhráid na hOifige seo i gcásanna thromchúiseacha.
Chuaigh an Oifig i ngleic leis an athrú a tháinig ar an timpeallacht oibre nuair a shuigh an Phríomh-Chúirt Choiriúil i limistéir réigiúnacha i rith na bliana. Mar gheall air seo bhí gá le hoifigigh ó Roinn na nAturnaetha taisteal go Luimneach agus go hInis chun freastal ar thriail choiriúla maidir le ciontaí a rinneadh sna limistéir sin.
Chun déileáil go héifeachtach le croílár oibre na hOifige tá sé tábhachtach go leanann muid de bheith i gcomhairle agus ag comhoibriú le gníomhaireachtaí eile ata ag plé leis an gcóras ceartas coiriúil ar leibhéal náisiúnta agus idirnáisiúnta. In aithint an tábhacht atá le comhoibriú agus gaol oibre tras-ghníomhaireachta lean an fhoireann de bheith páirteach in obair roinnt ghrúpaí oibre agus coistí i rith na bliana lena n-áirítear an Grúpa Idir-Oibreachais Ceartas Coiriúil; Grúpa Ríomhaireachta na Cúirte Uachtaraigh; agus Coiste Éifeachtachta na Cúirte Dúiche. Ar an leibhéal idirnáisiúnta tá an Oifig ag leanúint ar aghaidh ag tabhairt cúnaimh do chomhlachtaí éagsúla idirnáisiúnta lena n-áirítear EUROJUST (a bunaíodh chun comhoibriú a fheabhsú i ndáil le cúnamh frithpháirteach maidir le nithe coiriúla); GRECO (a bunaíodh chun a chinntiú go ndéantar Coinbhinsiúin na hEorpa i gCoinne Calaoise a chomhlíonadh); agus OLAF (Office Européen de Lutte Anti-Fraude - a bunaíodh chun leasanna airgeadais na gComhphobal Eorpach a chosaint i gcoinne calaoise agus éilliú). Tá an Oifig ag leanúint freisin de thacú le hobair an Chomhlachais Barra Idirnáisiúnta agus Comhlachas Idirnáisiúnta na nIonchúiseoirí.

Acmhainní a úsáid go hÉifeachtach

Mar an gcéanna le heagraíochtaí eile san earnáil phoiblí creideann an Oifig cé chomh tábhachtach atá sé úsáid chomh héifeachtach agus is féidir a bhaint as acmhainní. I rith na bliana lean an Oifig de bheith ag forbairt córais chun an fhaisnéis is gá a sholáthar do bhainisteoirí chun obair na hOifige a bhainistiú go héifeachtach agus a chinntiú go ndéantar ár n-acmhainní a roinnt agus a úsáid chomh héifeachtachtúil agus is féidir.

I dTuarascáil Bhliantúil na bliana seo caite, rinneadh tagairt don Tuarascáil Creat Faisnéise Bainistíochta a chríochnú, tuarascáil inar céannaíodh riachtanais faisnéise na hOifige. Céannaíodh trí chatagóir faisnéise a bhí riachtanach. Bhain said seo le hobair dhlíthiúil na hOifige, idirbhirt airgeadais na hOifige agus acmhainní daonna na hOifige. Tharraing Tuarascáil Bhliantúil 2003 aird ar chur i bhfeidhm Chórais Bainistíochta Acmhainní Daonna nua na státseirbhíse ag an Oifig. Tuairiscíodh ann freisin go raibh tús curtha ag an Oifig le córas nua cuntasaíochta a chur i bhfeidhm chun a riachtanais airgeadais a bhaint amach.
I rith na bliana 2004 cuireadh insealbhú an chórais nua cuntasaíochta i gcrích go tráthúil agus laistigh den bhuiséad. Leis an gcóras seo tá córas cuntasaíochta nua-aoiseach ag an Oifig atá dírithe ar ár riachtanais sonracha. Cuireann sé faisnéis bainistíochta níos fearr ar fáil go háirithe maidir le cuntasaíocht bainistíochta agus le buiséid a leagan amach agus cuirfidh sé tacaíocht ar fáil sa todhchaí maidir le costais a mheas agus cuntasaíocht faibhrithe. Faoin gcóras nua cuntasaíochta tá deireadh curtha le nósanna imeachta neamhéifeachtúil a bhíodh á ndéanamh de láimh agus tá dlús curtha le próiseáil íocaíochtaí. Tá leibhéal seirbhíse atá feabhsaithe go mór á chur ar fáil leis an gcóras nua.
Baineann an tríu catagóir faisnéise bainistíochta a céannaíodh sa Tuarascáil Creat Faisnéise Bainistíochta le hobair dhíthiúil na hOifige a bhainistiú. Léiríodh i dTuarascáil Bhliantúil na bliana 2003 go raibh an tionscnamh chun na riachtanais Teicneolaíocht Faisnéise a bhaint amach i bhfad níos deacra ná iadsan a bhain leis na córais airgeadais agus acmhainní daonna. Is é atá i gceist leis an tionscnamh seo ná córas Teicneolaíocht Faisnéise nua a fhorbairt chun an obair dhlíthiúil a rinneadh san Oifig do dtí seo chomh maith leis an raon freagrachtaí níos fairsinge a thig as aistriú fheidhmeanna ionchúisimh coiriúil an Príomh-Aturnae Stáit agus, ina dteannta, aistriú beartaithe na seirbhíse aturnae atáit, a bhainistiú.
Dúradh i dTuarascáil Bhliantúil 2003 go raibh súil go ndéanfaí an próiseas sonraíochta agu roghnaithe maidir leis an gcóras dlíthiúil nua chun cásanna a bhainistiú a chur i gcrích i 2004 agus go gcuirfí tús le hobair fhorbartha ag tús na bliana 2005. Cuireadh an obair shonraíochta i gcrích de réir an sprioc a leagadh amach i 2004 agus cuireadh tús le próiseas tairisceana chun an córas Teicneolaíocht Faisnéise a bhfuil gá leis a thionscnamh. Áfach, nuair a fuair an Oifig na tairiscintí ní raibh sí sásta go raibh an luach airgid iontu sásúil. Dá réir sin, rinne an Oifig an tairiscint a eisiúint arís. Tá súil anois go dtosóidh an obair fhorbartha sa tríú ráithe de 2005. Nollaig 2006 an spriocdháta chun an córas nua a chur i bhfeidhm.
Cuireadh tús le córas iniúchta inmheánach i rith na bliana chun rialú inmheánach a neartú agus chun an cleachtas is fearr a chomhlíonadh. Ag an am céanna ceapadh Coiste Iniúchta ar a bhfuil dhá chomhalta seachtrach, a mbíonn duine acu ina chathaoirleach nó ina cathaoirleach ar an gcoiste. Comhlíonann an Coiste a chuid oibre de réir théarmaí Chairt Iniúchta fhoirmiúil. Tá Plean Iniúchta Inmheánach glactha don tréimhse 2004 - 2006 a chlúdaíonn na príomh-ghnéithe d'obair na hOifige.
I dtreo dheireadh na bliana 2004 thosaigh an Oifig cleachtadh maidir le priacal a mheas chun na mór-phriacal do bhaint amach beartais, aidhmeanna agus oibiachtaí na hOifige a chéannú. Mar chuid den chleachtadh seo tionóladh sraith ceardlanna i measc ranna na hOifige agus ina ndiaidh chéannaigh iadsan a bhí páirteach na priacail agus an chontúirt a bhain leo. Rinne an príomh-fhoireann bainistíochta scrúdú ar na priacail a céannaíodh agus le cúnamh ón áisitheoir, chur said clár comhdhlúite de na priacail sin le chéile.
De thoradh ar chur i bhfeidhm Chéim II den Chóras Bainistíochta Leabharlann i rith na bliana, cuireadh an Modúl Ghnóthaithe agus an Modúl Srathach i gcrích. Mar gheall ar seo is féidir leabhair leabharlainne a ordú, a fháil agus a shonrascú go leictreonach.
Cuireadh tús le córas nua ama agus tionraimh, Vision Time Web, i mí na Nollag 2004. De bharr an chórais tá cuid de na freagrachtaí Acmhainní Daonna tiomnaithe do bhainisteoirí a bhfuil rochtain díreach ar líne acu ar an gcóras. Cuireann an córas VTWeb seirbhís níos éifeachtaí agus níos dlúsúla ar fáil agus tá deireadh curtha leis an gcóras páipéir a bhí ann roimhe seo. --

Seirbhís ar Ard-Chaighdeán

Is cuspóir leanúnach de chuid Oifig an Stiúrthóra Ionchúiseamh Poiblí é seirbhís ar ard-chaighdeán a chur ar fáil. Bhí ár gcleachtais seanbhunaithe mar bhunús don Chairt maidir le Caighdeán Seirbhíse agus An Plean Gníomhaíochta 2004 - 2006 a foilsíodh i rith na bliana, cáipéis phoiblí inar tugadh deis dúinn na caighdeáin seirbhíse ar féidir súil a bheith leo ón Oifig seo a leagan amach. Rinneadh an Chairt agus an Plean Gníomhaíochta a fhorbairt i gcomhairle lenár ngeallchoimeádaithe ionas go ndéanfaí a dtuairimí agus a raibh said ag súil leis ó thaobh seirbhíse de a thabhairt i gcuntas. Tá cóipeanna den dá cháipéis le fáil ar ár láithreán gréasáin ag www.dppireland.ie.

Chun caighdeán na seirbhíse a chuirtear ar fáil ón Oifig seo a mheas ní foláir féachaint sa chéad áit ar na staidrimh a léirítear i gCaibidil 10 den tuarascáil seo. Ar áireamh sna staidrimh tá an líon ionchúiseamh ar déileáladh leo; cé chomh tráthúil a bhí muid ag déanamh cinntí; an chaoi inar cuireadh na comhaid sin de láimh; na príomhchúiseanna le cinntí gan ionchúisimh a thabhairt; an toradh a bhí ar ionchúisimh a éistíodh ar díotáil i gcúirt; agus an líon iarratas ar phianbhreitheanna a athbhreithniú de bharr iad a bheith róthrócaireach. Is iondúil go ndéantar comparáid a bhunú ar thréimhse trí bliana. A mhéid is féidir a dhéanamh amach maidir leis an tseirbhís atá á cur ar fáil ag an Oifig, léiríonn scrúdú ar na figiúirí mar chéatadáin gur éirigh linn leibhéal na seirbhíse a cuireadh ar fáil le linn na tréimhse sin a chothabháil nó a fheabhsú.
Chun tuiscint níos fearr ar obair na hOifige seo a chur chun cinn leanamar ar aghaidh ag cur faisnéis suas chun dáta maidir le hobair na hOifige ar fáil trí fhoilseacháin ón Oifig ar nós Tuarascálacha Bliantúla, Treoirlínte d'Ionchúiseoirí agus Leabhráin Faisnéise. Chuireamar cláir oiliúna maidir le hobair na hOifige ar fáil do mhic léinn dlí Dhlí-Chumann na hÉireann agus do mhic léinn i gColáiste Oiliúna an Gharda Síochána sa Teampall Mór.
Baineadh go leor úsáide as láithrean gréasáin na hOifige i rith na bliana chun faisnéis maidir le hobair na hOifige a scaipeadh chuig an oiread daoine is féidir ar shlí a bhí rochtaineach agus tráthúil. Rinneadh ath-dhearadh ar an láithreán i mí na Nollag 2003 agus le linn na bliana 2004 lean muid d'fhorbairt an láithreáin ag cur béim ar chinntiú go gcomhlíonann sé na treoirlínte rochtaine go léir. Fuair os cionn 25,000 cuairteoir rochtain ar an láithreán gréasáin i 2004.
Leanamar den Ghaeilge a chur chun cinn trí fhoilseacháin oifigiúla a fhoilsiú go dhá theangach agus trí láithreán gréasáin dátheangach a chothabháil. I rith na bliana 2004, chun ár n-oibleagáidí faoi Acht na dTeangacha Oifigiúla, 2003 a chomhlíonadh, chuir an Oifig tús le hobair chun creat pleanála reachtúil a dhréachtadh, ar a dtabharfar "scéim" ina leagfar amach ár ngealltanais chun seirbhísí a sheachadadh trí Ghaeilge le linn na trí bliana seo chugainn. Faoi dheireadh na bliana 2004 bhí suirbhé curtha i gcrích ag fo-choiste de chuid an Choiste Comhpháirtíochta maidir le leibhéal líofachta Gaeilge i measc comhaltaí foirne na hOifige, i measc na ndaoine a bhíonn ag ionchúiseamh thar ár gceann sa tseirbhís aturnaetha stáit agus i measc na n-abhcóidí ar an bpainéal ionchúiseamh. Déanfar torthaí an tsuirbhé a úsáid chun tacú leis na gealltanais a leagfar amach sa scéim agus a chuirfear faoi bhráid an Aire Gnóthaí Pobail, Tuaithe agus Gaeltachta i mí Marta 2005. Is cuspóir tábhachtach don Oifig cabhair a thabhairt dár ngeallchoimeádaithe a ngnó a sheoladh trí Ghaeilge agus táimid ag súil leis an scéim a fhorbairt sa todhchaí.
I mí na Nollag 2004 sannadh ról ceannasach do chomhalta d'fhoireann Roinn na nAturnaetha i gcomhordú an chaidrimh le híobartaigh coireachta chun na seirbhísí atá á gcur ar fáil againn a fheabhsú maidir leis an ghnéith thábhachtach seo dár gcuid oibre.
Is gné thábhachtach dár gcuid oibre comhoibriú agus caidreamh le daoine aonair agus gníomhaireachtaí eile atá ag plé leis an gcóras ceartas coiriúil agus lean sé seo ar aghaidh i rith na bliana. Cabhraíonn an chumarsáid agus an chomhairleoireacht rialta eadrainn féin agus na daoine eile go léir a bhíonn ag plé le coireacht a ionchúiseamh seirbhís níos fearr a chur ar fáil do Mhuintir na hÉireann.

Geallchoimeádaí Inmheánach

Aithnítear sa Phlean Gníomhaíochta maidir le Caighdeán Seirbhíse 2004 - 2006 gur geallchoimeádaithe inmheánacha an fhoireann go léir agus is gealltanas de chuid na hoifige é timpeallacht oibre atá tacúil a chur ar fáil dóibh. Cuireadh tús le roinnt tionscnaimh i rith na bliana 2004 chun na críche sin.

I rith na bliana 2004 foilsíodh Straitéis Acmhainní Daonna 2004 - 2006, a dhréachtaigh fo-choiste den Choiste Comhpháirtíochta a raibh comhaltaí foirne as ranna go léir na hOifige páirteach ann. Cuireann an Straitéis cur chuige níos pleanáilte agus níos dírithe chun cinn maidir le bainistiú na hOifige agus riachtanais ghnó na hOifige. Ní foláir dúinn a bheith i gcónaí á chinntiú go mbeidh scileanna, inniúlachtaí agus cumas na foirne sách maith chun tabhairt faoi na tascanna go léir atá le comhlíonadh againn chun go bhféadfaidh an Oifig a bunfheidhmeanna a sheachadadh i dtimpeallacht atá ag athrú i gcónaí agus i réimse oibre atá ag éirí níos toirte agus níos coimpléascaí.
Cuireadh an chéad chuid den Chóras Bainistithe agus Forbartha Feidhmíochta i gcrích i mí na Nollag 2003 agus i rith na bliana 2004 rinneadh é a fhorbairt sa chaoi is gur cuid thábhachtach den chreat bainistíochta anois é a bhaineann leis an bpróiseas Pleanála Gnó. Cuireann an córas faisnéis ar fáil do bhainisteoirí a theastaíonn chun riachtanais foirne agus tacaíochta a bhfuil gá leo ar fud na heagraíochta a mheas agus díríonn sé freisin ar oiliúint agus ar fhorbairt chomhaltaí aonair den fhoireann chun a chinntiú go mbeidh na scileanna agus na hinniúlachtaí acu chun a ról san eagraíocht a chomhlíonadh. I rith na bliana 2004 d'infheistigh an oifig 3.95% den chostas pá in oiliúint agus forbairt foirne. Ar áireamh sa chaiteachas seo bhí €76,453 ar sheimineáir, comhdhálacha agus cúrsaí; €14,200 ar oiliúint Theicneolaíochta Faisnéise; agus €24,900 ar an scéim aisíoca táillí.
Cuireadh Clár Oiliúna Cúram Foirne ar bun i rith na bliana a raibh dhá mhodúl ann ar céannaíodh maidir leo go mbeadh oiliúint shonrach chun tairbhe gach comhalta den fhoireann: 'I gCoinne Bulaíochta & Ciapadh' agus 'Bainistiú Strus'. Ghlac an Oifig Beartas i gCoinne Bulaíochta agus Ciapadh i mí na Samhna 2003 agus tríd an gClár Cúram Foirne tairgeadh seisiúin meabhraíochta don fhoireann go léir chun ábhar an bheartais a chur in aithne dóibh agus le saincheisteanna maidir le bulaíocht agus ciapadh i gcoitinne. Rinne fo-choiste den Choiste Comhpháirtíochta suirbhé maidir le Bainistiú Strus i rith na bliana agus mar thoradh ar seo rinneadh cinneadh oiliúint maidir le Bainistiú Strus a thairgeadh do chomhaltaí go léir na foirne, a bhí dírithe go háirithe ar strus ionchasach a bhaineann leis an gcineál oibre a bhíonn ar siúl san Oifig. Eagraíodh Clár Tástála Sláinte freisin tríd an gCoiste Comhpháirtíochta i mí na Nollag 2004 agus bhain 80% de chomhaltaí na foirne leas as.
Acmhainn fíor thairbhiúil ab ea an próiseas Comhpháirtíochta arís don Oifig seo agus chuir sé deiseanna ar fáil chun dul i mbun comhairliúcháin agus díospóireachta idir na ceardchumainn agus ionadaithe bainistíochta a bhí iontach tairbhiúil chun dul i ngleic le roinnt saincheisteanna san eagraíocht i rith na bliana. Chomh maith leis na saincheisteanna atá luaite cheana féin sa chaibidil seo, chuaigh fo-choistí den Choiste Comhpháirtíochta i ngleic freisin le saincheisteanna ar nós Duais Luaíochta & Scéim le haghaidh Duais Fadseirbhíse a chur i bhfeidhm; Cumarsáid Inmheánach; na féidirtheachtaí a bhaineann le tele-obair; Scéim Ionchurtha Foirne a chur i bhfeidhm; tionscnaimh comhshaoil ar nós bainistíocht dramhaíola agus athchúrsáil a thosú. Déileáladh le roinnt mhaith tionscnaimh agus saincheisteanna mar go raibh deis ag comhaltaí foirne ar gach leibhéal bheith páirteach sa phróiseas comhpháirtíochta.