1. Obair Ghinearálta na Hoifige

Bunaíodh Oifig an Stiúrthóra Ionchúiseamh Poiblí leis an Acht um Ionchúiseamh i gCionta, 1974. Is ceann de na bun-fheidhmeanna a thugtar don Stiúrthóir faoin Acht ná ionchúisimh poiblí agus nithe coiriúla a bhaineann leo a threorú agus a mhaoirsiú.

Is ón nGarda Síochána, an phríomh-ghníomhaireacht imscrúdaithe náisiúnta, a fhaigheann Oifig an Stiúrthóra Ionchúiseamh Poiblí formhór na gcásanna coiriúla lena ndéileálann an Oifig. Mar sin féin, tarchuireann gníomhaireachtaí imscrúdúcháin speisialta eile roinnt cásanna chuig an Oifig freisin, lena n-áirítear na Coimisinéirí Ioncaim, an tAturnae Ioncaim, ranna Rialtais, an tÚdaras Sláinte agus Sábháilteachta, An Post, an tÚdarás Iomaíochta, an Stiúrthóir um Fhorfheidhmiú Corparáideach, agus údaráis áitiúla.

Is luach fíorthábhachtach de chuid na hOifige neamhspleáchas an Stiúrthóra Ionchúiseamh Poiblí. Luaitear go sonrach san Acht um Ionchúiseamh i gCionta, 1974 go mbeidh an Stiúrthóir "neamhspleách ag comhlíonadh a fheidhmeanna dó". Cosnaíonn Alt 6 d'Acht 1974 neamhspleáchas an Stiúrthóra trí cheangal a chur ar an Stiúrthóir agus a chuid oifigeach gan aon chumarsáid nó uiríoll a ghlacadh más ionann an chumarsáid nó an uiríoll agus baint mhíchuí le comhlíonadh a fheidhmeanna.

Tá trí roinn in Oifig an Stiúrthóra Ionchúiseamh Poiblí:

• Tar éis comhad imscrúdaithe a scrúdú, déanann an Roinn Treorúcháin cinneadh maidir le cibé acu ar chóir nó nár chóir ionchúiseamh a bheith ann nó má tá sé tosaithe cibé acu ar chóir nó nár chóir leanúint ar aghaidh leis. Cuirtear in iúl sa treoir a eisítear na cúisimh, más ann, a thabharfar os comhair na gcúirteanna. I gcásanna áirithe beidh gá le breis faisnéise agus imscrúdaithe sula bhféadfar cinneadh a dhéanamh. Bunaítear cinneadh chun dul ar aghaidh le hionchúiseamh ar chás prima facie - fianaise a d'fhéadfadh, cé nach gá go dtarlódh sé, cúirt nó giúiré a threorú chuig cinneadh go bhfuil an duine ciontach sa chion, thar amhras réasúnach. Tar éis cinneadh a dhéanamh chun dul ar aghaidh le hionchúiseamh, tugann an Roinn Treorúcháin, i gcomhairle le Roinn na nAturnaetha, treoracha agus teagasc ó am go ham chun a chinntiú go ndéanfar an t-ionchúiseamh a sheoladh go cuí.
• Gníomhaíonn Roinn na nAturnaetha, faoi cheannas an Phríomh-Aturnae Ionchúiseamh, mar aturnae don Stiúrthóir agus don Gharda Síochána le linn cásanna a ullmhú agus a chur i láthair i gCúirt Dúiche nó Cúirt Chuarda Bhaile Átha Cliath, sa Phríomh-Chúirt Choiriúil nó i gCúirt Choiriúil Speisialta, sa Chúirt Achomhairc Choiriúil, agus san Ard-Chúirt agus sa Chúirt Uachtarach. Lasmuigh de limistéar Bhaile Átha Cliath, déileálann 32 aturnaetha stáit áitiúla le cásanna ina limistéir réigiúnacha féin.
• Soláthraíonn an Roinn Riaracháin seirbhísí eagraíochta, bonneagair, riaracháin agus faisnéise a theastaíonn ón Oifig agus tugann sí tacaíocht freisin don Roinn Treorúcháin agus do Roinn na nAturnaetha.

Áirítear ar obair na hOifige:

• na comhaid imscrúdaithe coiriúla a chuirtear faoi bhráid na hOifige a bhreithniú
• cinneadh a dhéanamh cibé acu ar chóir nó nár chóir ionchúiseamh a thionscnamh nó cibé acu ar chóir nó nár chóir ionchúiseamh a bheidh tionscnaithe cheana féin ag an nGarda Síochana a leanúint ar aghaidh agus comhairle a thabhairt maidir le haon imscrúdaithe eile a mbeidh gá leo chun ionchúiseamh a thosú nó a leanúint ar aghaidh
• cinneadh a dhéanamh maidir leis na cúisimh a thabharfar agus aon chúisimh a mbeifear tar éis iad a thabhairt a bhreithniú
• cinneadh a dhéanamh maidir leis na profaí agus na hábhair eile a bheidh le tabhairt don chúirt agus don chúisí, lena n-áirítear saincheisteanna a bhaineann le hábhar nár úsáideadh a nochtadh don chosaint
• ionchúisimh choiriúla a chur i láthair i gCúirteanna Dúiche Dhúiche Chathrach Bhaile Átha Cliath agus achomhairc a eascraíonn astu a a chur i láthair sa Chúirt Chuarda
• na hionchúisimh choiriúla indíotáilte go léir a bheidh liostaithe i mBaile Átha Cliath a ullmhú agus a chur i láthair - lena n-áirítear triail sa Chúirt Chuarda Choiriúil, sa Chúirt Choiriúil Speisialta agus sa Phríomh-Chúirt Choiriúil
• abhcóidí a ainmniú agus a theagasc sna cúirteanna triail éagsúla chomh maith leis an Ard-Chúirt, an Chúirt Uachtarach agus an Chúirt Achomhairc Choiriúil
• teagasc a thabhairt maidir le hionchúiseamh i dtriail choiriúla a sheoladh lena n-áirítear cinntí a eisiúint faoi na ceisteanna dlí agus beartas poiblí éagsúla a éiríonn i gcúrsa imeachtaí coiriúla
• dul i gcomhairle de réir mar is gá le habhcóidí, aturnaetha stáit, comhaltaí den Gharda Síochána agus finnéithe gairmiúla
• cinntí a dhéanamh maidir le táillí abhcóidí a bheidh ag gníomhú thar cheann an Stiúrthóra agus na táillí sin a urscaoileadh
• cinntí a dhéanamh maidir le cibé acu ar chóir nó nár chóir achomhairc, lena n-áirítear achomhairc ar mhodh cáis shonraithe, a thabhairt nó ar chóir dul i ngleic leo agus imeachtaí ar athbhreithniú breithiúnach a thabhairt agus a chosaint
• iarratais ar bhannaí agus habeas corpus a éiríonn as imeachtaí coiriúla a chosaint
• pianbhreitheanna a meastar iad a bheith ró-thrócaireach a tharchur chuig an gCúirt Achomhairc Choiriúil
• gearáin agus líomhaintí ó chomhaltaí den phobal maidir le déanamh cionta coiriúla a bhreithniú agus, de réir mar is cuí, a tharchur chuig Coimisinéir an Gharda Síochána
• comhaid a bheidh curtha faoina bráid ag an mBord um Ghearáin i gCoinne an Gharda Síochána a bhreithniú
• doiciméid a mbeidh gá leo chun iarratais ar eiseachadadh isteach sa Stát a phróiseáil a dhréachtú nó a chur i gcrích
• iarratais ar chúnamh frithpháirteach idirnáisiúnta i nithe coiriúla a dhréachtú agus a dhéanamh
• bheith páirteach i gcoistí agus meithleacha oibre a bhaineann le dlí agus nós imeachta coiriúil; cláir speisialta oiliúna maidir le gnéithe d'ionchúiseamh coireachta don Gharda Síochana a éascú; agus comhdhálacha a eagrú i dtaobh nithe a bhaineann le ceartas coiriúil chun tairbhe ár ngeallchoimeádaithe
• comhoibriú agus páirteachas i gcomhthionscnaimh le gníomhaireachtaí eile atá freagrach as gnéithe den cheartas coiriúil, lena n-áirítear an Garda Síochána; na Coimisinéirí Ioncaim; an tÚdarás Iomaíochta; an Stiúrthóir um Fhorfheidhmiú Corparáideach; an tÚdaras Sláinte agus Sábháilteachta; gníomhaireachtaí ionchúiseamh eile; an tSeirbhís Chúirteanna; an Roinn Dlí agus Cirt, Comhionannais agus Athchóirithe Dlí; an Coimisiún um Athchóiriú an Dlí; an tSaotharlann Dlí-Eolaíochta; an Paiteolaí Stáit; An Lia-Bhiúró um Shábháilteacht ar Bhóithre; Oifig an Ard-Aighne; chomh maith le heagraíochtaí eile a chuireann ionadaíocht ar fáil do leasanna íobartach